اضطراب القلق الاجتماعي

عسلامة ، مشكلتي هي احمرار الوجه بسبب الخجل او حتى بدون اي سبب
الشيء هذا اثر فيا برشا معناها مثلا كيف تصيرلي الحالة هذي قدام حد نتأزم و نقعد ايامات و انا نخمم فاها لين وليت انقص من الخروج و هذا عملي حاجز قدام علاقاتي مع الناس حتى في القسم نبدى اغلبية الوقت ساكتة باش ما تصيرش الحاجة الي خايفة منها
لقيت الحل في اني نكثر من ال fond de teint و هذا بالطبيعة انقذني في برشا مواقف يعني كي نبدى حاطتو في وجهي نبدى نوعا ما مطمانة لكن توا ولاتلي مشكلة انو ما عادش نجم نخرج من غير ما نحط لفونديشن في وجهي و مش حتى حطان عادي نبدى نحط برشا باش ما يظهر شي من وجهي ما نجمش نقابل العباد من غيرو اي عبد الا عائلتي عادي نعطيكم مثال على حالتي لو كان يجيو بحذانا ضيوف و خاصة اذا نعرفهم لازمني نطلع نجري لبيتي و نلبز ال fond de teint بش نجم نهبط و نسلم علاهم
حتى كيف نبات بحذى حد نفز بكري قبل ما هو يفيق و نمشي نحط في وجهي
زادا كي نبدى قاعدة في مجموعة فيها ولاد من عمري نبدى متوترة و قلبي يدق و وجهي يحمار حتى كي نبدى حاطة fond de teint
نتذكر الفازة هاذي صارتلي عندها مدة عادا صحابي قالولي شبيك وجهك احمر قلتلهم شي سخنت و برا و انا من داخل نغلي انا ما كنتش هكا قبل كنت فدلاكة و ضحاكة و صاحبة جو منيش حشامة معناها اما الحاجة هذي خلاتني نتبدل برشا
الحاصيلو انا توا نتمنى نقابل العباد عادي من غير fond de teint و نضحك و نلعب عااادي كيما قبل و خاصة انو انا العام الجاي باك و لازمني نتلهى في قرايتي مش في الحاجة هاذي و لازمني نسال في الكلاس و كل
قولولي بربي شنوا الحل بش نتخلص من هالحكاية و لازمني نشوف طبيب نفسي و الا لا ؟؟ خاطر ساعات نقول هذي حاجة تافهة ما تستحقش طبيب