متأخرة لغويا

قبل كل شي شكر خاص لدكتور
Mahdi amous
لانو جاوبني هل قداه من سؤال سألتو
فحبيت انو نزيد نوضح الحالة الا فاها بنتي لانو اذا فما مشكل نحب ندخل من اللول
اولا سامحني خاطر باش نطول عليك دكتور(ة) اما حاولت اني نحكي كل شي على بنتي خاطر خايفة علاها
نعيش فاوروبا و وقت يتولد الطفل يعملولو اختبار السمع و بنتي الحمد ا الله سمعها بخير
ما عندها حد بخلافي انا و ابوها لا اصحاب لا جيران و هي البنت الاولى في العائلة
بنتي تو عمرها عام و 10 شهور تفهم كل شي و تعرف كل شي و ذكية برشا و اجتماعية لدرجة كبيرة (يعني كل ميعرضها حد اسلم علاها تولى تحكي معاه و تتحدث ياسر ومعادش تسكت و تحكي مع استعمال ايداها اما بكلام موش مفهوم يعني تحسها تحب تتكلم و توصل كلامها اما بكلامها هي و حتى حد مايفهمها
تتحدث تقريبا 20 كلمة بسيطة و اغلبها من حرفين بابا ماما تاتي كورتي تيتا ستا شيطا شاشي كوكاع اح هم مم لالا دم اش كوغا بح قدام نا باي تاعي ... البعض منهم تنطقهم في غير محلهم من غير ما تعرف معناهم
و تكون جمل من كلمتين زادا اغلبها تنطقهم على الهامش منغير ماهي تفهم معناها كيما بابا ايجا ، ماما مم ،كل شي تم، موش هدا

وقت تحب تاكل تقولي مرات مم و مرات ماما مم
وقت تحب على حاجتها مثال دبش ساك قلم تشيرلي بصبعها و تقولي تاعي
و ساعات كيف حاجة تعرفها متاع بوها تقولي تاع با
وقت نعيطلها حتى لو تبدى في بلاصة بعيدة تجي تجري و تقولي دم يعني نعم
قليل وين تعاود الكلام من ورايا حتى لو عاودت تبدا الكلمة معندهاش حتى علاقة بالكلمة الا قلتهالها
وقت تحب تشرب بتقولي اح
وقت تحب تقعد تقولي شاشي
وقت تحب على حاجة و نسألها هذا و يطلع صحيح بتقولي نم او دم (يعني نعم )
وقت متحبش على حاجة بتقولي لا او نا
بتقول ماما لكن ما تناديني ماما مازالت تناديني بابا
تعرف كل اجزاء جسمها (شعر اذن عين اسنان لسان فم ركبة رجل يد بطن اصبع ضفر راس انف )
تعرف جميع من في العائلة يعني وقت نقولها وين بابا وين اخوك وين ماما بتشير صحيح اما تنادينا كلنا بابا
وقت اطلب منها انها تجيب حاجة تلوج علاها حتى تلاقيها يعني تعرف كل شي نقولها عليه
تعرف كل الاشياء باسمها لكن مازالت ما تنطق اسمها
تركب مركبات من قطعتين بالصحيح حتى لو وضعت8 اشكال مع بعض
تبوسني و تحملني و ساعات وحدها وحدها تجيني و تبوسني و تمشي لبوها تبوسو
تحب ياسر انها تبدى عاملة روحها تحكي في التاليفون ولا تبدى تحط لخوها البيبرون في فمو
كيف خوها يعمل كوكاع و يبدا عندو ريحة خايبة تعمل روحها عايفة و تقول اع
نخمم انو ندخلها للحضانة
حاولت اني نقول كل شي
فهل هي تعتبر عادية في التطور اللغوي لانو برشا قالولي متأخرة؟